Euskal Buztingintza Museoa
Euskal Buztingintza Museoa Arabako Elosu herriko Ollerieta auzoan dago. Nekazari-giroko paraje natural zoragarri batean, Urkiola eta Gorbeiako parke naturalek inguraturik Arabako urtegien ertzean.
Etxea bera, garai bateko eltzegintza-lantegi berritu bat dugu, 1993an irekia jendearentzat, eta bere osotasunean berreskuratzeko proiektu handi hau martxan jarri izana, berriz, Blanka Gómez de Segura-ri zor zaio. Arabako Foru Aldundiak, bere aldetik, arrakastarako bidea erraztu zion egitasmoari, eta bi erakundeen arteko Lankidetza-hitzarmenari esker mantentzen da gaur egun.
1711n jasotako eltzegintza-lantegi hau, Ortiz de Zarate familiaren hainbat belaunaldik lan egindako buztingintzako tailer bat zen jatorrian. 1958an, hau da, Urrunagako urtegia egiteko lanak bukatu eta eltzegileek baliatu ohi zuten lurra urpean geratzean, ordura arteko jarduerari agur esan beharrean gertatu ziren haiek, urpean geratu zitzaielako, alegia, bere lehengaia: buztina.
Eraikinari erantsita, garai bateko labetzarra dago. Oinplano lauangeluarrekoa da hau, eta bederatzi metroko altuera du. Mendeetan zehar milaka eta milaka pieza erre dira bere erraietan, harik eta 1958an lan egiteari utzi zion arte. Eta 1993az geroztik, berriz, monumentu gisa jasoa dago Euskal Kultura Ondarearen Inbentario Orokorrean.
Lehenengo solairuan, Eusko Jaurlaritzarena den antzinako euskal buztin bilduma bat dago ikusgai. 380 pieza dira, XV. Mendetik aurrera erabilitakoak, zeinak herri oso baten pasatako sasoietako eguneroko bizitzara garraiatzen gaituzten.
Arrakasta gehien duen ekintza, Museora bisita gidatuez gain, tailerretan buztinlariak lanean ikustea da. Lan teknika eta metodoei buruzko azalpenak jasotzen dira.
Bisita ordutegia:
Astelehenetik ostiralera: 10:00etatik 13:00etara eta 16:00etatik 19:00etara
Larunbatetan: 10:00etatik 14:00etara
Igande eta jaiegunetan: Itxita
Kontakturako telefonoa: 945 45 51 45